مما راق لي
كيف تخلي الناس تحترمك وماتهز ثقتك بنفسك؟؟
اولا .. ما راح احد يحترمك الا اذا انتي فرضتي
احترامك لنفسك ... يعني اذا تبغي احد
يحترمك .. لا تنتقدي احد ولا تحرجي احد ولا
تسيء لأحد ... يعني مو معقول انتي تقللي ادبك
مع الناس وتبغيهم يعاملونك كويس ويحترمونك
؟؟ السن بالسن والعين بالعين ... والله حتى لو
كنتي كبيرة وما تحترمي احد راح يجي اللي
اصغر منك وما يعطيكي قدرك ... يعني اولا
ابدأي انتي بنفسك ... وحتى الصغير احترمية
وعامليه كأنه كبير ... وكمان الاطفال .. عادي لو
قلتي لطفلة : لو سمحتى او ممكن ؟؟ او شكرا ؟؟
لانه هذا الشيء بيعكس تربيتك انتي اولا ...
اذا تبغي تكسبي حب الناس واحترامهم لكي ؟؟
امدحيهم ثم امدحيهم ثم امدحيهم ... وركزي على
هذي النقطة ... بس طبعا مدح بدون مبالغة ..
وتعطي الناس اكبر من حجمهم ...؟؟؟؟ لا قصدي
امدحيهم من باب التودد والتلطف ... وهذي
الطريقة راح تفتح لك مجال كبير لكي بقلوب
الناااااس ... حتى لو كانت صاحبتك وتمونعليكي امدحي الصفات الحلوة فيها .. راح يتوطد
العلاقة بينكم اكتر واكتر ... اتذكر موقف لي مع
اخت زوجي كبيرة ... وهي حقانية نوعا ما ..
وركزوا على كلمة نوعا ما .. يعني مو دايم
حقانية ... ومرة كنت بتكلم معها وقلت لها
يعجبني فيكي الحق وما ترضي الظلم لأحد ....
والله يا بنات انبسطت كثير .. وحسيتها تحاول في
كل موقف انها تكون عند حسن ظني ... وصارت
توقف معايا ضد زوجي ... حتى لو موقف لي مع
امها احسها صارت تقول الحق حتى لو على
حساب امها ... لاني انا عززت لها هذي
الصفة ... وبينت لها انه انا اعرف اميز الصح
من الغلط ... واني لاحظت هذي الصفة فيها
مميزة ... وصارت تتقبلني اكثر من اول ... لانه
بصراحة المدح يلغي سوء الفهم بين الناس
ويقربهم لبعض ... بعكس اللي تحب تنتقد
الناس ..على الفاضي والمليان .. راح تنفر الناس
منها حتى لو منجد فيهم عيوب ... خلاص انتي
اشلك واشلهم؟؟ براحتهم اذا هذا الشيء ما
يضرك ... واذا كانت صاحبتك وتمون عليكي
وتبغي تنصحيها .. في طريقة لطيفة عشان تتقبل
منك النصيحة .. امدحيها قبل ما تعاتبيها ... يعني
مثلا انتي متضايقة انه صاحبتك مقصرة معاكي
وما تتصل ولا تسال ... واذا جاية تعاتبيها قولي
لها اولا : كنتي اول ما شاء الله تسألي وتهتمي
فيني ومحد فاكرني غيرك لكن اتغيرتي هذي
الفترة وما تسألي ... يعني زي كذا ... الخ
والله بتتقبل منك وتقلك عذرها ... غير كذا انتي
راح تتعودي على هذا الاسلوب <وهذا الاسلوب
يناسب الشخصيات الغير محبوبة للناس> يعني
امدحي الناس بدون مناسبة وفي حدود .. مو كل
ما شفتي وحدة تمدحيها اكثر من 10 مرات وفي
كل مرة تتقابلوا؟؟؟ لا لا لانه بكذا راح تفقدي
هيبتك امدحي بالمعقول من باب التودد والتلطف
مو من باب اعطاء الناس اكبر من حجمهم؟؟
كمان بقلكم انه الناس الجريئين .. ينقسموا
لقسمين .. في جريئين على وقاحة .. وفي جراة
على ادب
انا شفت بنفسي ناس جريئين بقلة ادب ... امكن
هي ما تقصد انها تسيء لأحد.. لانه الجمل ما
يشوف سنامة لكن الناس بتشوف الشيء اللي انتي
ما تشوفيها ... اعرف وحدة حبوبة وجريئة لكن
لسانها مفلوت منها يعني عادي ممكن تقولها لكي
في وجهك < كلي .....>
في وسط المجلس
بصراحة والله تروح من هنا ... وتلاقي الناس
بالقوة يبلعوا كلامها ... ويتضايقوا كثير منها ...
وزي ما قلت لكم امكن هي متعودة على بذاءة
اللسان وما تقصد ... لكن الناس ماهي ملزمة
تتحمل اشكال زي كذا ... واذا زعلتي منها ...
تزعل منك وتقول انا ما اقصد وانتي حساسة
وكثير ناس اقلهم كذا وما يزعلوا ... يعني فرحانه
انه الناس ما تزعل .. طيب يختي امكن الناس
ذولا يجاملوكي او يعدوها لكي ... يعني انتي ليش
تجيبي الكلام لكي ...؟؟؟؟ خلاص كل وحدة تبلع
لسانها وتسكت احسن من لو جاها احد ويقولها لها
في وجهها ... يعني خذيها براسك من البداية
وفي شخصية جريئة بس بأدب ... والله ذولا زي
العسل على قلوب الناس ... واعرف نماذج كثيرة
من هذي النوعية ... يعني تلاقيها جريئة في
النقاش والاخذ والعطاء وفي نفس الوقت مؤدبة
في الاسئذان وما تحرج احد ... لانه في ناس
جريئين ويستغلوا جرائتهم في احراج الناس الاقل
جرأة منهم <وانا اكره هذي النوعية>
...في ناس خجولين ويتمنوا يكونوا جريئن ... اذا
تبغي تتعلمي الجرأة .. لازم تفرقي بين الجراة
الوقحة والجراة الادب ... اعرف ناس من
جراتهم والله ما يحترموا خصوصيات الغير ...
يعني ممكن عادي تفتح شنطة اللي جنبها مع انه
احتكاكهم رسمي ... يعني اللي تعاملي بيه
صديقتك الحميمة مو لازم تعاملي بيه الناس اللي
احتكاك بيهم وسط او عادي .. لأنه بتفرق
كتير ... وفي ناس تاخذ جوال اللي جنبها وتقول
ايش عندك رسايل حلوة؟؟ او تسال كم راتبك ؟؟
زي ما قلت لك صديقتك المقربة ليكي جدا تختلف
عن باقي معارفك السطحيين ... احترمي
خصوصيات الغير .. وهم راح يحترموا
خصوياتك ...
وعلى فكرة الناس الاكثر جرأة<اقصد الجرأة
الوقحة > هم اكثر ناس عرضة للمواقف
البايخة ... يعني لو مثلا فتحتي جوال اللي جنبك
في المجلس راح تحرجك صاحبة الجوال
وتقول ... <استئذني طيب؟؟ > او تقول <بلا
لقافة> يعني اخذتي على راسك ... وليش تحطي
نفسك في هذي المواقف؟؟ اعقلوا يا بنات
اعقلواااااااااااا
طيب كيف تتعاملي مع الشخص اللي يقطع كلامك
وانتي تتكلمي؟؟؟
وهذي طريقة حلوة ومجربة ... ولاحظتها على
كذا شخصية قوية تعملها ... اذا احد قطع
كلامك .. اسكتي خليه يخلص كلامه <وهنا انتي
بتعلمية انك ارقى منه>
واذا خلص كلامه قولي له : خلاص خلصت ؟؟
واذا قال : ايوة ... ارجعي للناس اللي كنتي
تكلميهم وقولي لهم : المهم وصار كذا وكذا
<يعني كملي موضوعك عادي > وشاركي
الشخصية اللي قطعت كلامك معاهم ودخليها في
نقاشك وقولي انا كنت اقول كذا وكذا يعني
احرجيها بقوة... وزي ما ذكرت لكم اهم شيء
تعابير الوجه ما تكون فيها ضعف وما تكون فيها
قوة وجبروت .. لا خليها وسط .. يعني لما تقولي
للشخص اللي قطع كلامك ... خلاص خلصت؟؟؟
قوليها بأبتسامة عريضة مع تسبيل بالعين زي
اللي تبغي تحرجيه... مع صوت واطيء نوعا ما
<كأنك رايقة > اتمنى تكون وصلت الفكرة ....
طيب كيف تتعاملي مع الشخصية اللي تحرجك
بالمجلس سواء بقصد او بدون قصد ؟؟؟
هذا الموقف على حسب شخصيتك ... اذا انتي
من الناس اللي عندهم سرعة نباهة ويحضرك
الكلام من وقته ردي من وقتها ... بس ...
وانتبهي لكلمة بس
ردي بس برواقة ودفاع عن نفسك اذا الموضوع
يحتاج للدفاع يعني اتبعي الحدة بالصوت بس
يكون واطيء صوتك.. يعني مزجتي قوة
الشخصية <الصوت الحاد> مع الروقان
والتواضع اللي هو <الصوت الواطيء > ودايم
المزج بين القوة والتواضع والله يا بنات يعطيكم
شخصية روووعة والكل يحترمك ... يعني لا
تكوني ضعيفة والناس تتجرا عليكي .. ولا تكوني
قوية والناس تنفر منك ومن اسلوبك ... حتى تكرة
تتعامل معاكي ..
يعني سواء تبغي تناقشي او تدافعي او تعاتبي ...
امزجي بين القوة والتواضع في اسلوبك .. وان
شاء الله بيكون اسلوب ناجح ... يعني يبغالكم
تمرين اكثر من مرة وابدأو مع شخصية وحدة
وبعد كذا اتدرجوا لأكثر من شخصية ...
طيب نرجع لمحور موضوعنا ... اذا احد احرجك
في المجلس .. طبعا اذا كنتي من النوع الخجول
او ما يحضرك الكلام بسرعة استخدموا لغة
العيون ..لا تقولوا هذي كمان ما تقدروا ولا ما
تعرفوها .... يعني اذا احد اساء لك ... وقال :
لبسك هذا شفته السنة اللي فاتت بالمحل
الفلاني ...<يعني لبسك قديم> انظري لها نظرة
انه مو عاجبك اسلوبها او مالك صلاح .. بس
انتبهوا تكون نظرة احتقار .. لا لا مو هذا اللي
نبغاه .. احنا نبغى نحرج الطرف الثاني عشان
ينتبه لكلامه المرة الثانية ... يعني زي لو مثلا
رفعتي الحاجب مع ابتسامة صفراء ... يعني
حسسيها انه كلامك ماله داعي ... الغرض انك
تحرجيها انتي ...
يا بنات لا تستهونوا بتعابير الوجه ولغة
العيون ... والله انها ابلغ من الكلام .. اعرف
بنات جريئات بأدب بس والله في مواقف كثيرة
يستخدموا تعابير الوجه في المواقف .. مع انهم
يقدروا يردوا ويدافعوا ... بس زي ما قلت
الصمت ابلغ من الكلاااااام .... يعني بالنظرات
والصمت تقدري توصلي اللي ماتقدري توصليه
بالكلام .... وبكذا وصلتي اللي تبغية ووفرتي
عليك الكلام الكثير ...
اكثر شيء اكرهة في اسلوب بنات حواء
لما وحدة تجي تقول ... فلانة أذتني .. وفلانة
ظلمتني .. وفلانة قذفتني ... وايش اعمل ؟؟
تلاقي اغلب الردود .. اخسريهم ترى الخسران
يقطع المصران ... او ترد وحدة وتقول : طنش
تعش تنتعش ... يا كرهي في هذا الاسلوب
ههههههههههههههه
يا بنات في نقطة لازم اقولها لكم ... الخسران
يقطع المصران لما تكون الوحدة شخصيتها قوية
وبمزاجها خسرتهم وطنشتهم او سامحتهم... هم
كذا بيعرفوا انه سكوتها بمزاجها وعفو منها وليس
ضعف وهذا اللي موجود في حديث الرسول
<العفو عند المقدرة> يعني اللي يعفو عن الناس
وهم قادرين ياخذوا حقهم لهم اجر من الله ...
ومافي وجه شبة بين العفو عند المقدرة جنب
العفو عند الضعف ...
انا تعجبني الوحدة لما يكون عندها قدرة تسوي
البحر طحين ومع ذلك عفت عن الناس وسامحتهم
وبكل رحابة صدر كما قال الرسول صلى الله
علية وسلم <ليس القوي بالصرعة ولكن القوي
اللذي يملك نفسه عند الغضب>
اما الشخصية الضعيفة ... حتى لو طنشت او
خسرتهم ... هم بيفتكروها ضعف منها وما تقدر
تسوي شيء .. ما يدروا انه بنات حواء قالوا
لها :اخسريهم الخسران يقطع المصران
ههههههههههههه
انا هنا ما بعلم الشخصيات الضعيفة انهم يردوا او
ما يطنشوا ؟؟ لا لا لا .. انا اقصد انها تتعلم قوة
الشخصية وبعدها تعفو وتسامح عشان ربها مو
بضعف منها؟؟؟
واذا ما تقدر ...طيب بلاش تتعلم قوة
الشخصية ... اقل شيء تتعلم انه محد يتجرأ
عليها ... يعني تعتبر نفسها كيان له قيمته
واحترامة ... <قال الرسول صلى الله علية وسلم:
المؤمن القوي خير، وأحب إلى الله من المؤمن
الضعيف. وفي كلٍّ خير>
ولما فاضل النبي صلى اله عليه وسلم بين
المؤمنين قويهم وضعيفهم خشي من توهم القدح
في المفضول، فقال: "وفي كل خير" وفي هذا
الاحتراز فائدة نفيسة، وهي أن على من فاضل
بين الأشخاص أو الأجناس أو الأعمال أن يذكر
وجه التفضيل ، وجهة التفضيل. ويحترزبذكر
الفضل المشترك بين الفاضل والمفضول، لئلا
يتطرق القدح إلى المفضول وكذلك فيالجانب
الآخر إذا ذكرت مراتب الشر والأشرار، وذكر
التفاوت بينهما. فينبغي بعد ذلكأن يذكر القدر
المشترك بينهما من أسباب الخير أو الشر. وهذا
كثير في الكتاب والسنة
نرجع لموضوعنا
كيف تتعاملي مع الناس اللي انتي احرجتيهم بدون
قصد؟؟
طبعا اذا كان الشخص اللي احرجتيه شخصيته
قوية اكيد بيرد ويدافع عن نفسة
ساعتها طالعي فيه وابتسمي ... زي اللي تبغي
تقول معك حق يعني اتركي له مجال يدافع عن
نفسة .. ولا تغالطية او تعارضية .. بس انظري
له نظرة اطمئنان وابتسامة حتى لا يشتعل النقاش
بينكم ... بس برضوا لازم تكون عندك ثقة وانتي
تنظري له .. والثقة هنا بتكون بطريقة جلستك او
نظرتك مع تواضع بالأبتسامة والنظرة الحنونة
له <لأنك احرجتيه > اعطيه مجال يقول اللي
يبغاه
اما اذا كانت الشخصية اللي احرجتيها ضعيفة او
خجولة مرة .. وحسيتي انه الطرف الثاني
اتضايق ... على طول قولي والله امزح معاكي ..
سواء بينكم لوحدكم او بمجلس عام
وارجعي امدحيها .. وقولي مثلا : والله ست
البنات انتي ومحد يجي زيك ... يعني غطي على
الاساءة اللي عملتيها فيها ... وعشان ما تحس
بحقد لكي ... وارجعي كلميها واضحكي معاها ..
عشان تحسسيها انك مو متعمدة تسيء لها ...
وبقي نقطة مهمة ...
في ناس كذا من الله شخصيتهم ضعيفة ونفسهم
يتغيروا ... ويبغالهم وقت حتى يتغيروا ... طيب
اعلمكم حركات سريعة تعطيكي ثقة في نفسك لو 50
% بدون مجهود او تعب
اذا دخلتي مجلس تسلمي على احد ... اتخيلي
نفسك بطلة فلم او شخصية محبوبة لكي <هذي
قرأتها من دكتور> وطبعا بطلة الفلم اكيد بتكون
واثقة من نفسها صح؟؟؟ اعتبري نفسك هذي
الشخصية .. وشوفي كيف ثقتك في نفسك
تزداد .... وطريقة مشيتك تعكس شخصيتك ....
وطريقة وقفتك ... وحتى ابتسامتك ... طول منتي
ماشية وانتي اتخيلي هذي الشخصية .. وبالتالي لا
شعوريا العقل الباطني يصدق احساسك .. وراح
تتقمصي الشخصية ببراعة ... يعني هنا انتي
بتنمي الثقة هذي في نفسك بدون مجهود في الكلام
او النقاش وغيرة ... وهذا حل سريع للي يبغالهم
جهد حتى يغيروا نفسهم ....
ايش اللي اكره في المراة ؟؟
اكره المرأة اللي ما تفرق بينها وبين الرجال ...
سواء بالصوت او المسترجلة .... او اللي
تضارب وترفع الجزم ... يا كرهي لهم ... احيانا
تلاقي حرمة وديعة وشكلها ناعم ... بس اول ما
تتكلم تصير عيونك كذا ؟؟
تتفاجأي بالصوت .. والاسلوب ...واليد اللي
ترتفع وهي تتكلم .. كانها شوية وتقوم تعطيك
بوكس هههههههه
لا واذا احد غلط عليها تمسح فيه البلاط ....
بصراحة هذي الشخصية يطول الحكي فيها عشان
تتغير ... وانا هذي الشخصية مرفوضة بالنسبة
لي عشان كذا ما بضيع وقتي فيها ... الافضل
تقرأ كلامي اللي كتبته كله فوق ... وتحاول تتغير
للأفضل ... لأنه هذي الشخصية مفروغ النقاش
فيه ...
يا بنات .. تقدر الوحدة اذا كانت دفشة تتغير
وتصير دلوعة وغنوجة ... والله تقدر ... بس
يبغالها تمرين مرتين او ثلاثة ... وتحسي نفسك
اتغيرتي للافضل
واكره الوحدة اللي تجي وتقول ... فلانة متصنعة
الدلع.. ليش متصنعة ؟؟؟ اعطوا الناس فرصة
تغير نفسهم ... خليها تتصنع .. على الاقل احسن
منك قاعدة تبذل مجهود عشان تغير نفسها ... بالله
عليكي انتي مو نفسك تتغيري للأحسن وتصيري
دلوعة وزوجك يغرم فيكي ؟؟؟ نفسك ولا لا؟؟
طيب ليش ما تحاولي تبدأي مع نفسك ؟؟ ترى
الدلع يعطي الوحدة اصغر من سنها بكثير ... بس
طبعا الدلع الحلو .. مو الدلع اللي على ثقل طينة
؟؟ في البداية ما راح تعرفوا تزبطوها .. لكن مع
اول مرة جربي مع زوجك ... وشوفي كيف ...
عندي لكم نصيحة اذا تبغوا تجربوا شيء ويكون
اول مرة ؟؟ جربوها على انها مزحة في البداية
مع أي شخصية سواء زوجك او صاحبتك ...
ليش طيب؟؟ لانه لو زبطت معاهم كان بها ..
ولو ما زبطت على الاقل الطرف الثاني عارف
انك بتمزحي ... يعني ما بتتفشلي ؟؟اوووكي يا
حلوين ؟؟
صدقوني والله انا متأكدة انه بيصير موضوع
الدلع جزء من شخصيتكم ... يعني انتي جربتي
مثلا 11 طريقة للدلع .. قولي مثلا 6 منها زبطت
معاكي .. و4 منها ماعرفتي تجيبيها ... مع
الاستمرار والممارسة بال 6 ذولا اللي زبطت
معاكي تصير جزء من شخصيتك .. وال4 هذي
اتركيها ودوري حركات دلع غيرها .. حتى تكتفي
خلاص ... اسألوا مجرب
واخيرا
نصائح ذهبية على السريع
-حاولي قد ما تحاولي تقوي شخصيتك عشانك
وعشان الناس تحترمك وتعملك حساب
-لا تخلي احد يغلط عليكي .. واذا احد غلط
عليكي اتعلمي تردي بأدب ... وارجع اكرر
بأدب مثلا : لو احد قلك يا كذابة ...حتى لو كان
مزح قولي : لا معليش انا مو كذا ... منها
انذار لها ولغيرها اذا فكر انه يغلط عليكي
كمان ...ممكن رد بسيط منك لكن تعطيهم
فرصة كبيرة يراجعوا حساباتهم معاكي
-التسامح مع قوة الشخصية ... تعبر عن قوة
شخصيتك الفذة خاصة اذا كانت عارفة الناس
انك تقدري تاخذي حقك لكن عفو منك
اتنازلتي ...
-اعتذري اذا غلطتي على احد ... لانه ما
بينقص من شخصيتك شيء ... بس لا تعتذري
لدرجة انك ممكن تذلي نفسك لا لا ... اعتذري
في المعقول
-حاولوا تضيفوا لمسات على شخصيتكم
واهمها الدلع والغنج ... وهذي سهلة تقدري
تتدربي عليها وجربي اول شيء مع زوجك
على انه مزحة في البداية حتى تقدري
تتقنيها ...
-اذا كنتي مسترجلة ... نصيحة ولوجه الله لا
تفتخري بقوتك الرجولية ... حاولي تغير نفسك
جذريا من الالف الى الياء ... والله بتقدري بس
شوي شوي ... وراح تتقني الدرو بمهارة ..
واذا رجعتي لرجولتك مرة اخرى ... اتذكري
انك انثى واتضنعي الدلع حتى يضبط معاكي
ياليت تقراو الموضوع اكثر من مرة ... حتى تستفيدوا اكثر ... الكلام صح طويل بس التطبيق سهل للي عنده عزيمة وارادة يغير نفسة
وبس ان شاء الله يعجبكم..
الجمعة فبراير 17, 2012 10:20 am من طرف 
موضوع: اصنعى شخصيتك بنفسك هـــــــام للمميزات 
يعطيك العافيه يا اختي
